Gunung Srandil

Gunung Srandil.

Gunung Srandil yakuwe salah siji bukit sing ana nang Glempangpasir, Kecamatan Adipala. Jarak antara objek wisata guwe karo Kota Cilacap sekitar 30 km aring arah timur laut (ngalor manlan ngetan sitik), karo ya itungane murah ditempuh nganggo kendaraan penumpang bis umum jurusan Cilacap-Jatijajar-Kebumen, utawa kendaraan pribadi mergane dalane wis aspal karo perek sekang dalan jalur kidul.

Wisata ziarah

Nang Gunung Srandil ambin dinane pada akeh uwong sing teka nggo ziarah soale tempat guwe ora mukur dikenal nang masyarakat sekitar tok, tapi ngantek njaba pulo Jawa, diantarane Sumatera, Kalimantan, Bali, karo Sulawesi. Mula sing berkunjung tujuane ya macem-macem. Sing ziarah biasane teka utawa tapa nang malem Jumat Kliwon utawa Slasa Kliwon nang sasi Syura.

Legenda rakyat

Nang Gunung Srandil akeh petilasan wong-wong sing dianggep nduwe kadigdayan sing linuwih utawa kemampuan sing nglewihi wong liya sing dikenal dadi tokoh-tokoh wong sakti mandraguna. Sekang kemampuane, kesaktiane guwe tempat-tempat sing disinggahi dianggep keramat karo disakralna.

Ganu manut critane penghuni pertama Gunung Srandil yakuwe Sultan Mukhriti, putra keloro sekang Dewi Sari Banon Ratu Sumenep Jawa Timur. Tekane sultan guwe nggo tapa, tapi Sultan Mukhriti murca (ngilang) sing ana gari petilasane tok sing nang sebelah wetan sing dikenal nganggo aran Embah Gusti Agung Sultan Mukhriti.

Seliyane guwe ana legenda rakyat sing pertama manggon nang Gunung Srandil yakuwe wong loro, jenenge Kunci Sari karo Dana Sari. Wong loro guwe prajurit Pangeran Diponegoro sing ora gelem nyerah aring bala tentara Belanda. Lorone pada melarikan diri aring Gunung Srandil nggo ngumpet, nang gunung guwe uga wong loro mau ninggal. Makam prajurit mau ana nang sebelah wetan Gunung Srandil nang njero siji komplek sing dipager mubeng. Aran Kunci Sari dikenal nganggo aran Sukma Sejati.

Anapun petilasan-petilasan liyane sing ana nang Gunung Srandil yakuwe Mbah Kanjeng Gusti Agung, Nyai Dewi Tanjung Sekarsari, Kaki Semar Tunggul Sabdojati Dayo Amongrogo, Juragan Dampo Awang, Kanjeng Gusti Agung Akhmat utawa Petilasan Langlang Buwana sing ana nang nduwur bukit, karo petilasan Hsing Sukma Sejati.