Antasena
Antasena utawa uga sinebut Anantasena. Ananta : tanpa wates Sena : njaga, nguasani, kang mimpin
Ing pedhalangan gagrag Jogjakarta, Antasena kuwe anak ragil Bima/Werkodara. Biyunge Dewi Urangayu, putrine Hyang Mintuna (dewaning iwak ing banyu tawa) ing Kisiknarmada (muarane Gangga karo Kali Serayu). Wiwit lahir urip bareng karo ibu lan simbahe. Ing gagrag Surakarta, Antasena kuwe jeneng liyane Antareja (anak pembarepe Werkudara). Nanging sayane suwe gagrag Surakarta ngadaptasi gagrag Jogjakarta saengga Antasena dadi tokoh putra ragile Werkudara. Dadi pada karo gagrag Jogjakarta, ing gagrag Surakarta putrane Werkudara ya telu, Antareja, Gatotkaca lan Antasena.
Ing wayang, Antasena nyandhing Dewi Jenakawati, putrine Janaka/Arjuna. Satriya iki uga raket karo wuragile Arjuna, Wisanggeni.
Antasena ora nate gelem nganggo basa krama, jujur, prasaja, lan kendel. Gandheng ibune kuwe urang, awake kebak sisik kang ora mempan dening gaman. Kadigdayane ana eneng sungute lan nduwe aji-aji Cupu Madusena sing bisa nguripke wong kang mati ing njaba takdire.
Nalika Perang Baratayudha arep diwiwiti, Antasena ngadhep Sanghyang Wenang. Sanghyang Wenang sabda yen Antasena kepengin Pandawa menang, satriya iki kudu ora melu perang. Antasena nyanggupi nurut kekarepane dewa. Sanghyang Wenang njaluk supaya Antasena ndeleng netrane. Suwe-suwe awake Antasena dadi cilik lan banjur muksa.