Kenthongan

Sekang Wikipédia, Ènsiklopédhi Bébas basa Banyumasan: dhialék Banyumas, Tegal, Cirebon karo Jawa Serang/Banten lor.

Kenthongan kuwe salah sijining kesenian pertunjukan massal sing perangkat utamane kenthong. Perangkat kenthong digawe sekang potongan pring sing dibolongi dawa nang sisine. Jaman gemiyen, kentong kuwe fungsine akeh nang masyarakat. Fungsi utamane nggo alat komunikasi jarak jauh. Contone dinggo aweh utawa nyebarena tanda peringatan dini bahaya bencana, makna komunikasine ana nang ritme swaran tabuhane karo kombinasi selang swara. Makna monine kuwe diatur sesuai kesepakatan nang masyarakat.

Jaman siki, alat kiye umume fungsine mung sebagai hiasan nang omah-omah, wis kalah kagunaane karo peralatan komunikasi elektronik sing modern.

Kesenian Kentongan biasa digelar nang upacara-upacara resmi, sebagai hiburan kanggo tamu sing teka. Nang wilayah mBanyumasan malah wis ana festival resmi kentongan dadi akeh kelompok-kelompok kentongan sing muncul.

Perangkat tambahan kesenian kiye antarane Beduk, Seruling, Kecrek, Pianika lan liya-liyane. Masing-masing kelompok dipimpin Mayoret, pemaine umume lanang, jumlah pemaine ± 20 an.